MIXTAPE BAIRRO SIDE "DISPIDIDA"

Grupu di Rap, "Bairro Side, dja reuni pa grava un Mixtape ki ta asinala ses reunion. Elementus di grupu stevi kada um envolvidus na otus projetus durante tudu es tempu, i gosi es sta djunta pes kolabora na gravason di novus sons.
Mixtape tem komu titulu "DISPIDIDA", e um nomi um koxi contraditoriu dja ki rapaz sa ta Re-Uni. Ma kel Despidida la é na sentidu di dispidi "maus dias", i abraça espasu pa novus oportunidadis i novus ideias.

Kaminho é pa frenti i union ta fazi forsa.

Nhos fika ku atenson. Em breve ta sta na street ta sirkula
Buddha

ku apoio di www.hiphopditerra.com. Pa nu valoriza Hip Hop kriolu.

POLYFREE

Nomi: José Lino POLYFREE Ramos Marques
D. N.: 26 / 02 / 1980
Obi:
www.myspace.com/polyfreemanbs
Odja: Videoclip

Kumesu:
Maz konxedu pa Poly entri amigus, i Polyfree muzikalmenti. Free e pamodi palavra em si, ki ta kompletal, ta flal tudu. Poli em gregu munti i free pa kompleta (Munti Livri). E kumesa na kuartu ta brinka ku beats stranjerus ta ba ta skrebi I dikora letras, uzas na beat, já ki ka tinha otu forma di fazi gravasom, era ranja instrumental, poi ta toka I kanta si letra. Si ke ba ta kumesa panha gostu. Kel primeru kontatu ku mic na palku foi por volta di 95. Mutu antiz dje obiba hi hop, kantu ovi kel ixpluzon na S. Visenti ku Black Side, Ice Company etc… Desdi la ba rola ti oji em dia.

Primerus pasus:
Foi na si kaza, meiu arkaiku, ku di amigus ku di Kaya. Es ta baba ensaia pa shows ki ta tinha djuntu ku Azaiaz, ku Sox ku An2 i Leny tb (Black Power), ez ta enkontraba la sempri, kada um ku si grupu, tinha txeu konviviu, brinkadera I kolaborasom, so dipoz ke sai di tera ki ez bem forma um grupo (Bairro Side).

Primerus show:
Primeru grupu di Poly, formadu pa el ku Djodji di platô, txomaba DJs, Elder di bairro era sez manager, na altura ez ta staba na munti show ki ta tinha na munti lugar na kabu verdi, sima Gamboa I na otus lugar na Santiagu, la pa interior, pamo Elder tinha si grupu ku Bitori intom sempri e ta ranjaba manera di inklui DJs (Poly ku Djodji) na progamasom. Poly ta asumi ma foi na brinkadera ma dipoz e tevi ki asumi kompromisu ku muzika.

Asumi:
Kel pasaji pa enkara muzika maz a seriu foi inda na kabu verdi, na estudiu improvizadu na kubiku Azayas, undi ki ku poku rekursus i meius ez odja ma era posivel. So ku um PC, um programa, mikrofoni i fones. Azayas era di kes primeru di grupu ki staba maz ligadu na produsom i meiu muzikal, di manera ki Poly i restu di grupu tudu tudu prendi txeu kuza la. Poly pasa ta subi palku na tarrafal, na somada, na festas na liceu, na altura kampanha, festas komisiu, etc. Kada um tinha si grupu ma era tudu unidu ta fazi mesmu trabadju.

Bairro Side:
Bairro Side unidu komu grupu bem surji na portugal, sima Poly ta fla. El e di kes primeru ki bai Portugal, dipoz kes lotu ba ta txiga pa studu. Dja na Portugal ez kumesa ta xinti kel nesisidadi di algum kuza pa alivia kabesa di vida di studanti, uniku refujiu kes atxa foi oras kes ta staba djuntu ta fazi muzika, foi na um di kes refujiu ki es disidi forma grupo Bairro Side.

Sobri BS:
Poly atxa ma dentu BS, na um sertu pontu, kada um tem si tarefa, Azayas por izemplu ta asumi txeu parti di koru na kuazi tudu muzika, el e ta entra ku rap, Buddha ku Kaya i Klauz també, inda em relasom a beat kuazi tudu sta ligadu a prudusom di beat menos Kaya pamo nunka e interesa pa kel aria la, um ta surji ku um beat, ta aprizenta kez out kel beat, es ta reuni pa nu odja kel ki ta da., skodji um tema, skrebi letra, "e ka trabadju na um algem, ma sim munti trabadju na tudu algem, kada kenha ta fazi parti di tudu".

Primerus anu na Portugal:
Pasadu tres anu na Portugal Poly xinti ma foi redi bom pamodi, alem di staba sempri em kontatu ku muzika tevi kel oportunidadi di sta na kel mesmu ambienti ki es ta staba na Kabu Verdi (Poly, Buddha, Kaya, Klauz, Azayas), tevi kontatus i interkambius ku otus rappers di portugal ki ez bem konxi, sempri na meiu di muzika, e partisipa na trabadjus ki ba ta sai, mixtapes, CD, e kanta I tambe e ranja beat pa kes ki ka tinha kondisons, etc.

Influensias:
Poly sempri fla me ta obi tudu tipo muzika, "si e muzika poi nu obi". E tevi influensia na obi munti stilu diferentis di muzikas, desdi techno, drum-n-bass, reggae, heavy, hip hop stranjerus (merkanu, franses, chines, etc), kela ki difini si manera di ixpresa - kru i agresivu - pamo kel ke ta fla, e ta permiti transmiti kel xoki, pa agridi di forma puzitivu, sima um xoki atravez di muzika, Poly ta splika. Inda putu e ta obiba Kriss Kross, grupu ki influensial txeu pamodi e ta kurtiba ses manera di bisti, di repa, I na altura e tinha mazomenus mesmu idadi ki es, sem fla kes nomi konsagradu di hip hop merkanu i nau so, inda maz e ta obi sepultura, nirvana, na lisboa djuntu ku pesoal sempri ta roda munti stilu di muzikas, ma ku hip hop komu bazi, kela ki ta pol xinti maz free.

Na atividadi:
Para alem di grupo Bairro Side i si projetu pesual, Poly tem stadu ativo na otus trabadjus, sima partisipasom na projetu di DC Brown na frança, na holanda ku Fidjuz di Cabral, tambe Rasta Man di Mobass, CD Hip Hop Praia, partisipasom na projetus ki ta sai na street sempri di um DJ di Reboleira, etc. Kel prokupasom na sta viradu maz na partisipa ativamenti ku otus artistas,ta kaba pa ser gratifikanti pamo, sima e ta fla, e ta prendi txeu ku kel interligasom, si e bem izula so na si projetu e ta fika mutu perdidu. Ma gosi e sta konsentradu na termina mixtape di Bairro Side, finaliza kes sons ki sta gravadu ku Klauz i Kaya (ki gosi sta na frança). Enkuantu si mixtape ka sai, si myspace ke si mixtape, undi ke ta ba ta divulga si trabadju, si bazi i plataforma portantu. Sigundu Poly, "tudu algem ki tem se plataforma, pa divulga si atividadi, ki ta sai ta ganha e hip hop kriolu".

Um pajina importanti:
Ouvi um altura ki grupu tevi um "afastamentu", elementus di Bairro Side toma otu rumu pamo vida si ki leba, intom Poly bai pa holanda u ki pol ganha txeu, foi la ke tevi kontatus ku munti artistas kriolu ligadu a hip hop i nao so, em rilasom a hip hop e stevi sempri ligadu ku grupu Fidjus di Cabral, sempri ta riprezenta Bairro Side, kela foi si background, na tudu kau e ta flaba "ami e di bairro Side, nha grupo". Na kel periudu e ta fazeba parti di grupu, ta fazeba muzikas I da ispektakulus djuntu ku es, sempri "Fidjus di Cabral feat Polyfree". Es canta na Prasinha Kebrod na festas di Sao Joao, na Pyra 80, na prizensa di Filu (ex prezidenti camara di praia). Foi um experiensia puzitivu I riku ke tevi pamo ka foi so na muzika, foi na munti area, e odja moda ki kes rapaz la ta trabadja na estudiu, moda ki es ta anda na meiu di industria di muzika, kel mensajem ki FDC ta pasaba ku imajem di Cabral na t-shirt, es tinha teatro, dansa, tinha Kelda baxu kaza ke ta staba undi tudu amigus ki sabi toka ta xintaba pa tardi muzikal, Artur, Duco (B-Original), pur izemplu. E prendi txeu kuza la.

Difuzom:
Dentu grupo Bairro Side membrus sta ranja otus atividadis para alem di grupu, Buddha dizemvolvi hiphopditerra.com, Azayas ranja AZ Produtions, Klauz kre anja um editora, Poly e di kes ki sta uza video komu um di kes forma di difundi hip hop kriolu. E ta xinti kativadu pa kaptasom di imajem tantu fotografia komu video,

Di volta a bazi:
Di volta pa Portugal Poly bem atxa so Klauz ku Kaya, es debati kuze ki es sta bem fazi. Kontinuidadi di projetu foi tema di reunion já ki Azayas staba na CV na si projetu, Buddha tambe staba na CV ku Republica, na ses diretitu ses sonhu ku projetu, i Poly ta asumi ma kel pauza foi bom na um pontu. "Si tudu nu saiba Bairro Side ta fikaba mortu, nu kontinua ta reprezenta bairro side sempri, ouvi um falta di komunikasom ki kaba pa ser rizolvidu i gosi nu sta ku forsa já ki Bairro Side e independenti di muzika e um komunidadi di tudu bairrensi i na muzika BS sta na CV, na Portugal, na Merka na Holanda I na Fransa".

Projetu:
Por enkuantu Poly sta konsentradu na mixtape di Bairro Side pa dipoz pe ranja um tempu pa pripara si mixtape, Dje teni beat a vontadi, letras tambe, pa di li seis mês tenta pol na rua, objetivu maz pa frenti ke teni em menti e tenta um formasom na muzika ou na produsom, mixtape pra ja e ka objetivu imediatu, "tudu algem kre fazi mixtape ma por enkuantu nha myspace e nha mixtape". Otu manera di ndivulga ke tem e ses vídeo ke ta fazi na Windows Media Player. E ta atxa ma tudu forma di divulga um trabadju e validu ma um artista debi uza tudu modos pa tinji si fim ke divulga si trabadju. Atualmenti e sta atualiza si myspace, e sta grava novus sons pa mixtape di Bairro Side, e sta pripara tambe alguns pa di sel, e sta kria kondisoes pa dizenvolvi área di áudio visual pa odja kuze ki ta da, sem plania txeu ba ta panha ideias ki ta surji.

Sobri Hip Hop Kriolu:
Pa kel ki dje obi, hip hop kriolu sta mutu asosiadu a violensias i kuzaz negativus. E fla ma ez txiga di manda vídeo pa Kabu Verdi pa divulga na tilivizom (Afrika CV ku Jorge "Sumara") es rekuza pasa video i justifikasom kes da foi ma rap e kuza di violensia, nem siker es ka odja kontiudu di muzika, ki era "Afrika CV", ki ta fala di palop di irmandadi etc, situasom ki dexal tristi pamodi na praia e atxa ma tem kes ki ta kontrola produsom muzikal I ki ta bara entrada a txeu algem, "dês di sempri nu baradu, txeu difikuldadi ki nu tevi si ka era kel nos vontadi oji nu ka staba li". Hip hop e urbanu bem pa dura, oji sta uns ta mori ta bem otu". Poly ta difendi ma Hip Hop tem ki aseitadu i mas ki asita, tem ki djuda promovi i produzi, muzikas i clips di kualidadi pamo e um forma di divulgadu Kabu Verdi. Sinau e kel imajem di poku kualidadi ki ta pasa. Na Holanda e ta obiba hip hop di tudu tipo, ate mandarim sem intendi nada, ma kuza bem fetu ta da pa obi, na kel linha di pensamentu li ki debi apostadu pa fazi hip hop kriolu avansa. Poly inda ta termina pe fla ma es sta abri porta pa jerasom ki sta bem ka pasa kel ki es pasa, ki es sta pasa inda, "si na kel tempu ez daba noz abertura oji nu staba na otu patamar di hip hop kriolu, kem sabi na futuru na um festival di Gamboa ta abri ku kabesa di kartaz ku grandis nomis di hip hop kriolu".

KAIA

BAIRRO SIDE

KLAUZ

Nomi: Klaus "NARKOTIK" Castro
D. N.: 01 / 10 / 1981
Obi:
www.myspace.com/klawzcastro
www.myspace.com/bairroside


Percurso musical:
Klaus Castro (rapper, produtor) naxsidu i kriadu na Praia, kabu verdi, mas presizamenti na Bairro Craveiro Lopes a 01 di Outubro di 1981. Si entrada ofisial na mundo di Hip Hop foi na Maio di 2002. Des di prinsipio foi ku Bairro Side. Foi na kubiku di Azaiaz ki tudo kumesa. Klauz grava si primeru son, "Fika ku Mi", djuntu ku "Az, "Dapox, "Jo, ku "Leny, (2 pikena ki ta fazeba korus pa Bairro Side na kel altura). Foi desdi kel dia ke pasa ta pertensi a familia Bairro Side. Na mesmu anu (Outubro), é bai pa Portugal ku objetivu di inicia studu universitariu na Lisboa. La é torna encontra Azaiaz, Buddha, Kaya ku Poly, ez da kontinuidadi a projetu Bairro Side. Pasadu un anu, devidu a contrariedadiz di vida, é fika so el ku Buddha na Lisboa, kez otuz rapaz volta tudo pa kabu Verdi. Klauz ku Buddha, pa es ka para di fazi ses muzika i kontinua ta representa Bairro Side, es inisia un projetu ki es da nomi di NOLEDJE (derivadu di palavra ingles knowledge – kunhesimentu). Na veron di 2003 Buddha tambe tevi ki volta pa kabu Verdi, ou seja klauz fika el so. Por isu é rizolvi konsentra maz na produson di instrumentals, kuza ki foi bom pamo hoji pratikamenti 98% di se musikaz e fetu na si propi beatz. Mas tardi Kaya ku Poly volta di novu pa Portugal, houvi novu reunion pa kontinua ku projetu Bairro Side, gosi ku klauz, kaya i poly, já ki rapaz ki fika na Cabo Verdi kumesa novuz projetuz (Republica – Buddha ku Dapox; AZ Recordz – Azaiaz), kuza ki ka ta fazes dexa di ser membrus di Bairro Side. E sima un família, sta na sangui. Em termus di produson, klauz kumesa ta da ses primeruz pasus ku ajuda di Buddha, ki foi se mentor na inisio, na programa Fruity Loops. Oji em dia é ta uza mas Reason ku Logic Pro. É sta gosi konsentradu maz na Rap ku R&B, ma tambe é sta da primeruz pasus na drum and bass.


Projetuz:
Klauz ku Bairro Side sta ta trabadja pa lansa, ainda na 2008, si tudo bai konformi previstu, ses primeru mixtape. A nivel pessoal, ti final di 2008 é sta bem tra 2 mixtape, un a solo, ki titulu sta ben ser P.R.E.T.U. – Pa nha Rasa Evolui Tudo Unidu, otu é un mixtape ku varius rappers ta kanta na beatz produzidus pa el.


Kontatus:
radyk6@hotmail.com
(+351)961479131

BUDDHA

Nomi: Niltom "BUDDHA" Andrade
D. N.: 05 Dezembro
Obi:
myspace.com/kemkebuddha
myspace.com/republicamixtapes
www.hiphopditerra.com

Inisiu:
Buddha sta na Bairro Side desdi se kriason na inisiu di nuventa, e entra na Rap ketu ketu sem pasa riba ningem nem imita ningem, ku txeu influensia di rappers merkanu sima - Dr Dre, NWA, Death Row e 2 Pac. E kumesa Ku nomi Buddha Bass e tinha se prujetu djuntu ku Sitó - "Matchu Bass", ku Black Power (Azaiaz i Sox) "CKP" ( Chema, Kaya e Pops) e otus grupus di Bairro ki dipos es bem kria Bairro Side.

Époka di nuventa foi markadu pa munti sucesu sima "Meia noite" , djunto ku Azaiaz e An2, "Festa" djunto ku Azaiaz, "Blue" djuntu ku Azaiaz i munti otus ki fazi txeu susesu i marka karera di Buddha . Na fim di nuventa Sitó bai pa merka i Buddha kontinua na Bairro Side, na kel epoka la e muda nomi pa Buddha yo.

Perkursu:
Na 2003 Buddha bai pa Portugal ma nunka e ka para flow. Kantu Azaiaz, Poly, klauz i Kaya bai tambe pa la, Bairro Side ganha forsa otu bes, es parsi ku mas forsa, ku Azaiaz, Klauz e Buddha djuntu na produson bem sai grandis hits, ki ti hoji ta fazi susesu na Praia, temas sima "Sai ku mi" (Produzido pa Tober, undi primeru verson ta konta ku participason di Buddha, Poly , Klauz, Azaiaz e Kaya, i ki remix bem sai na projetu "Hip Hop Praia" ku partisipasom di Dapox) , out som foi "Nós Natal" ku partisipasom di Aurélio (mas um fidju di bairro) na gitara, i munti musikas ki mostra ma Bairro Side ka sta paraba nem standu fora di Bairro. Kantu Azaiaz, kaya ku Polly sai di portugal, Buddha ku Klauz bem funda Noledje pa kontinua flow, sempre ta representa Bairro Side, kel union leba Buddha a entra mas na mundu di produson, e foi di kel projetu li ki sai munti novus susesus di sima "Miss Liceu" , "Timenti kurason sta bati" , "Musika sta dentu mi" i tantus otus ki dura ta txoma atenson dentu CV.
Buddha dipos bem volta pa Cabo Verde ma é kontinua ligadu na BS, djuntu ku Azaiaz i Dapox és kontinua ta fazi hit ki rabenta dentu Praia.

Atualidadi:
Na 2005 é kumeça novu projecto djunto ku Dapox - "República" , ki kumesa ta fazi txeu diferensa dentu di Cabo Verde ku susesus sima "Sempri BS", "Manera Simplis" (ku Eder), "Its Me – Remix" (ku Paulinha), "És sena di Musika" i otus tantus.
Hoji em dia REPUBLICA dja sta fazi parti di senariu musikal di Cabo Verdi. REPUBLICA é formadu gosi pa Buddha, Dapox, POPS, BIZZY, C.R. e Baby Boy. Republica dja kanta na grandis palkus di Santiago sima Festival STRELA na Gamboa i na Kebra Canela, Festival LG na Gambôa i na Tarrafal, djes atua na Maioria di zonas di Praia i na atividadis di liceus sima tambe na Somada, Picos, Santa Crus, São Domingos, Bomba H, Auditorio Nacional, Assembleia Nacional, Palácio Cultura, Cinema Praia, Tabanka Mar, Cockpit, 100º aniversário de Praia na Plateau, i tantus otus lugar. Hoji Republica ta konta na Discografia ku 5 Mixtapes i es sta na kriason di mas um, i tambe na mixtape a solo di kada membru di grupu.

Inisiativa:
Na 2007 Buddha djuntu ku Bizzy e B. Boy es kria "Double B Produtions" ki djuda Republica na entra inda mas na mundu di Produson i larga dependensia na Beats merkanu na ses musikas.

Na 2008 Buddha, ku Bizzy, és kria www.hiphopditerra.com, i ku kulaborason di Khaló, Batcha i Stars, site dja torna hoji na referencia numeru 1 pa komunidadi di Hip Hop Kriolu, undi bu ta atxa rappers di mundu interu ki ta kanta na kriolu ta divulga ses projetus i ta kompartilha ses konhesimentus.

Trabadju:
Primeru MixTape di Buddha - "Kem Ke Buddha" foi lansadu na Julho di 2008 ku um show na diskoteka Bomba H, i novu mixtape - "Sinhor di Underground" dja sta ta fazi susesu ku novos singles na street. É partisipa na mixtape di Stars, joe, Rapaz 100 juiz i di otus rapper tantu ta kanta komu na produson di beats.

Projetu:
Um di kes projetus di Buddha e di lansa um Mixtape "Hip Hop di Terra" , um koletania di rappers ki teni musikas na site www.hiphopditerra.com, i tambe um mixtape "All Stars in the Hood" ki ta bem ser koletania di muzika undi otus rappers ta kanta ku Republica. Fica atento.

Kontatu
napac2@hotmail.com

AZ - AZAIAZ

Azaiaz Nomi: Carlos Admir Horta da Silva "AZAIAZ"
D. N.: 24 / 07 / 1979

MOKI TUDU KUMESA:
AZAIAZ (muziku, produtor muzikal, promotor, editor de imagens), naxsidu i kriadu na Praia, kabu verdi, mas presizamenti na Bairro Craveiro Lopes a 24 di junho di 1979. Si entrada ofisial na mundo di Hip Hop foi na setembro di 1990. Na prinsipio foi ku Black Power (ku Sox i César, tudu 2 di Bairro també), undi ke da si primerus pasus, ke tra medu palku i kumesa ta enfrenta publiku. Dipoz di 5 ano é bem kria Bairro Side ki era pa ser um grupu konstituidu pa varius grupus i jovens ki ta kantaba rap e R&B di Bairro, ki na altura era "CKP, BUDDHA BASS, AZAIAZ e AN2, BLACK POWER, dipoz bem surji otuz sima PUTOS DI BAIRRO, ELSA e LIZZY".

Foi na kubiku di Azaiaz ki tudo kumesa.

PERKURSU MUZIKAL
Primeru som ki foi gravadu foi "S.A.P.E.C.", a partir di la BS pasa ta fazi sons sempri preokupandu ku kel ki ta rodeaba es. Dipos di munti tempu ta fazi som so na Kubiku i gravasons kazerus ku nivel técnico mazô menus i ku kualidadi baxu, undi ta destaka serka di 1 centena de temas ki fazi susesu dentu de Bairro e na Praia interu, muzikas sima "festa", "blue", "yo", "meia noite", "bairro side", marca epoca de noventa e principio de 2000, na prinsipiu di anu 2000 Azaiaz bem viaja pa França na undi ke tevi oportunidadi di entra na várius estudios profisional i Home studio, di la é fika ta sabi mazô ménus mó ki ta funsiona mundo di muzika i di gravason. Dipoz di pasaji pa França é disidi na bai pa Portugal undi ki é inkontra Buddha, ki foi um grandi valia pamo Buddha bem mostral lugares i pol a par di mundu di Muzika digital (a nivel di software, etc), djudal na kêz primeru pasu na Frutty Loops Cool edit, a partir di lá kuriozidade nunka ka dexal satisfetu i pol sempri ta prokura más.

Na Portugal també é di rifiri ma Bairro Side djunta novus membrus, kazu di Khaló (Designer, Fotografo e Amigo di BS).

Experiensia na Portugal foi bom, dja ku Bairro Side (Azayaz, Buddha, Kaya, Klauz, Poly Free) es kanta na vários palkus i es tevi varios experiensias, má foi na Praia ki Bairro Side tevi si momentu máz alto a nivel di audiensia ku lançamento di música "Sai ku mi".

TA ROLA:
Dai surji AZ PRODUCTIONS pa lansa novus talentus, pamó tudu alguem ta kria fazeba móda Bairro Side, ta kria tem kel kualidadi di gravason ki es tinha, i di la AZ disidi na poi AZ PRODUCTIONS máz na ouvidu di alguem. Es tevi ki fazi várius múzikas ku nomi pa podi "pêga". Felismenti tudu muzika ki AZ fazi tevi suseso na rádios e fora també.

Dipoz di 3 anos AZ entra na um formason di áudio na Kapital Estudio pa Zunga Pinheiro la e xinti ma dje teni um bazi pa fazi um gravason di kualidadi seja undi for, na Estúdio Profissional ou Home studio i també a partir di la é poi kubiku máz evoluidu a nivel tékniku (gravasons di muzika era fetu tudu na kaza - "kubiku"), undi ki es fora paredi tudu á prova di som ki poi kualidadi di gravasom aumenta, i pasa ta txoma AZ Records Estúdio Kubiku. Gossi dja teni novu fazi di Kubiku undi ki tudu sta Profissional, passa di 16 pa 24 bit

Na 2005 AZ fazi "Hip Hop Praia Vol 1", na 2007 é grava projetu "Calheta in love", é partisipa na CD "Dj Ivan - Som y Tom", atualmenti el é Editor de Imagens na ACI (Agência Caboverdeana de Imagens), produtora di programas pra RTP ÁFRICA e Não só (Nha Terra nha Cretcheu, Top Crioulo, etc)

PROJETUS:
AZ sta bem lança Hip Hop kriolu vol 1 (CD/DVD), gravasons sta dikori manenti na 2008, é sta bem lança "Mix Tape Bairro Side vol 1" I també album a solo di Azaiaz sta em gravason.

KONTATUS:
azaiazbs@hotmail.com

UNDI KI STA BAIRRO SIDE

BAIRRO SIDE - NA KEL TEMPU